27 sentyabr 2020-ci il tarixdə başlayan 44 günlük Vətən müharibəsində Azərbaycan Prezidenti, Silahlı Qüvvələrin Ali Baş Komandanı İlham Əliyevin uzaqgörən siyasəti və qətiyyəti sayəsində Müzəffər Ordumuz işğalçı Ermənistan qoşunlarının və terrorçu dəstələrinin darmadağın edilməsinə və Azərbaycanın ərazi suverenliyinin tamamilə bərpasına nail olunmuşdur.

Bu, şanlı hərb tariximizin bir  səhifəsidir. Müzəffər Ali Baş Komandan xüsusi vurğuladığı kimi, bu Qələbə tarixdə əbədi qalacaq! Ona görə ki, 44 gün ərzində Azərbaycan Silahlı Qüvvələri düşmən ordusunu məhv edərək, öz ərazi bütövlüyünü bərpa etdi: “Mən dəfələrlə demişdim ki, Azərbaycan xalqı heç vaxt işğalla barışmayacaq. Dəfələrlə demişdim ki, nəyin bahasına olursa-olsun, biz öz torpaqlarımızı geri qaytaracağıq.

 Dəfələrlə demişdim ki, düşmən öz xoşu ilə torpaqlarımızdan çıxmasa, biz onu torpaqlarımızdan qovacağıq. Və belə də oldu: biz Birinci Qarabağ müharibəsindəki məğlubiyyətlə barışmadıq: güc topladıq. Bütün gücləri səfərbər etdik. Ordumuzu gücləndirdik. Ölkə iqtisadiyyatını gücləndirdik.

 Ölkəmizin nüfuzunu qaldırdıq. Və öz tarixi missiyamızı şərəflə yerinə yetirdik. Biz düşməni torpaqlarımızdan qovduq və ədaləti, beynəlxalq hüququ bərpa etdik. Biz milli ləyaqətimizi bərpa etdik. Və bu gün Azərbaycan xalqı müzəffər xalq kimi yaşayır. Bu gün Azərbaycan dövləti qalib dövlət kimi yaşayır! Və bundan sonra biz müzəffər xalq və qalib dövlət kimi əbədi yaşayacağıq”!

Bu Qələbə həm də cəsur, qorxmaz, vətənpərvər oğullarımızın qanı-canı bahasına əldə edilmişdir. Belə oğullardan biri də 1985-ci ildə Kəlbəcər rayonunun Zəylik kəndində anadan olmuş Vusal Eldar oğlu Musayev idi. 1992-2003-cü illərdə Kəlbəcər rayonunun 103 saylı tam orta məktəbində oxuyub. Orta məktəbi bitirdikdən sonra Vusal vətənimizin müdafiəsi üçün Səfərbərlik və Hərbi Xidmətə Çağırış üzrə Dovlət Xidmətinin Kəlbəcər rayon şobəsi tərəfindən muddətli həqiqi hərbi xidmətə çağırılaraq Mudafiə Nazirliyinin Ağdam rayonu ərazisində yerləsən “N” saylı hərbi hissəyə gondərilmis, 1 il 6 ay muddətində nümunəvi xidmət edərək, tərxis olunmusdu.

Vusal Musayevin hərbi xidmətə çox böyük həvəsi vardı. Həmişə evdə hərbi xidmətə getmək istədiyini bildirirdi. Hətta 2016-cı ilin “Aprel döyüşləri” zamanı da o, muraciət edərək müddətdən artıq həqiqi hərbi xidmət qulluqçusu kimi xidmət etmək istədiyini bildirmişdi. Lakin həmin vaxt muharibə olmadığı, həmçinin səfərbərlik elan edilmədiyi üçün müraciətinə müsbət cavab verilməmişdi.

2020-ci ilin yay aylarında, Tovuz rayonu istiqamətində baş vermiş düşmən hücumu zamanı genral-mayor Polad Həşimovun və digər hərbi qulluqçuların şəhid olmasından sonra Vüsal Musayevin hərbi xidmətə həvəsi daha da artdı.

O, Polad Həşimov və digər şəhidlərimizin qisasını düşməndən almaq üçün 2020-ci ilin sentyabr ayında müddətdən artıq həqiqi hərbi xidmət qulluqçusu kimi xidmətə qəbul olunmaq üçün yenidən etdiyi muraciətə müsbət cavab verilmişdir. Ona görə də 11 sentyabr 2020-ci il tarixdə Müdafiə Nazirliyinin Tərtər rayonu ərazisində yerləşən “N” saylı hərbi hissəyə MAHHXHQ əsgər kimi xidmətə qəbul olunmuşdur.

27 sentyabr 2020-ci il tarixdə Azərbaycan Respublikasının ərazi bütövlüyü uğrunda başlanan döyüşlərə Vüsal Musayev də həvəslə qoşulur və ailəsinə düşmən tapdağında qalan əraziləri azad etdiklərini, ona görə də ondan  narahat olmamalarını, hər şeyin qaydasında getdiyini deyirmiş.

Vüsalın döyüş yolu təəssüf ki, qısa oldu: 29 sentyabr 2020-ci il tarixdə düşmən tərəfindən açılmış atəş nəticəsində yanında mərmi partlaması səbəbindən yaralanmış və hospitala aparılmışdır. Hospitalda olan müddət ərzində ona ön cəbhədə yaxşı döyüşdüyünü, düşmənə sarsıdıcı zərbələr endirdiyini, öz xoşu ilə deyil, aldığı xəsarətlər nəticəsində döyüşlərdən uzaqlaşdırıldığını, həmçinin ona xidmətinə görə, "Cəsur döyüşçü" və "Suqovuşanın azad olunmasına görə" medallarının verildiyini desələr də, döyüş yoldaşlarını döyüş meydanında qoyduğu üçün çox üzülürdü.

06 yanvar 2021-ci il tarixdə döyüşdə aldığı xəsarətlər səbəbindən hospitalda şəhidlik məqamına yüksələn, iki övlad atası Vüsalın ruhu şad olsun ki, özündən sonra onun vətənə layiqli oğul olduğu danışılır və onunla fəxr edilir. Arzusunda olduğu Kəlbəcər - Qarabağ düşmənlərdən azaddır. Sənin və digər şəhidlərimizin ruhu vətənin göylərində, ən böyük zirvəsindədir, şəhid qardaş!

Şəhidin qardaşı Yavər  Musayevin  yazdıqları da bir daha onun Vətənə olan borcunu ləyaqətlə yerinə yetirməsi öz  təsdiqini tapır: “Vusalla  mənim aramda yaş fərqimiz az olub. Qardaşım qorxmaz, mehriban və yüksək vətənpərvərliyə malik idi. Məktəbə Vusalla birlikdə gedib-gələrdik. Qardaşım valideynlərimizin bir sözünü iki etməzdi. Vusal orta məktəbi bitirən ili atama dedi ki, hərbiçi olmaq arzusundayam. Atam bəlkə də onda məyus oldu. Çünki o, hər zaman ermənilərin bizim xalqın başına gətirdikləri vəhşilikdən ürək ağrısı ilə danışardı. Bunun tək səbəbi onun erməni vəhşiliyindən əziyyət çəkən bir ailədə böyüməsi idi.

Vüsal o qədər mehriban idi ki, ondan heç kim zərrə qədər də inciməzdi. Vüsal bu mehribançılıgını xidmətə yollandığı hərbi hissələrə də daşıyıb apara bildi. Görüşəndə və ya telefonla danışdıqca da Vüsalın Vətənə ürəkdən bağlılığını aydın görürdük. Bütün bu xüsusiyyətlər Vüsalı sonda ülvi bir ucalığa - şəhidlik zirvəsinə apardı.

Vüsalsız mənə, bir qardaş kimi, indi çox ağırdı. Onunla keçirdiyim vaxtlar mənim üçün xoş xatirələrə çevrilib. Əziz qardaşımın timsalında bütün şəhidlərimizin ruhu qarşısında baş əyirik”.

...Vətənin göylərini qara bulud alanda anaların əlləri göylərdə qalıb həmişə. Gecə-gündüz dua edərlər ki, “düşmən qabağında olanları, İlahi, özün qoru”!

Yağı düşmənin gülləsinə tuş gəlib şəhadət zirvəsinə ucalan oğullara ağı deyib, boyunu oxşayan da elə analar olur. Gizli-gizli göz yaşlarını ürəyinə axıdan analara söz və qələm adamlarının təsəllisi də bax beləcə, qəm-qüssəli, lakin vətənpərvərlik duyğuları ilə yazılan şeirlərdir:

Ağlama, şəhid anası!

Ağlama ki, Vətən belin düzəltsin!

 Sızlama ki, balan yolun gözlətsin!

Ana gərək dərd-sərini gizlətsin,

Sən anasan, Vətən ana deyilmi?

Demişdik ki, qəddini bük, əyilmi?!

Ağlama, şəhid anası!

Qalx ayağa, qoy Tomrisim oyansın!

Qalx ayağa, yağı qana boyansın!

Qalx ayağa, düşmən sussun, dayansın!

Türkün oğlu at belində doğular!

Bunu bilsin qorxaq, yaltaq yağılar!!!

Ağlama, şəhid anası!

Oğul doğdun, oğul olsun yurduna,

Oğul doğdun, əsgər olsun orduna!

Oğul doğdun, qurban olum mərdinə,

Bilirsənmi neçə oğul-qızın girovdu?!

Başımdakı şimşək, qaşımdakı qırovdu?!

Cəmilə Çiçək/Zekainfo.az

Prezident təqaüdçüsü,

flologiya üzrə fəlsəfə doktoru