Azərbaycan Respublikasının Prezidenti İlham Əliyev 2026-cı ilin əvvəlində yerli televiziya kanallarına verdiyi geniş müsahibədə ana dilinin qorunmasını milli təhlükəsizlik və dövlətçilik baxımından strateji prioritet kimi xüsusi vurğuladı. Artıq ənənə halını alan bu müsahibələr ötən ilin yekunlarının təhlili və yeni ilin əsas hədəflərinin cəmiyyətə açıq, şəffaf şəkildə təqdim edilməsi baxımından mühüm ictimai platformaya çevrilib.

Müsahibə çərçivəsində dövlət başçısı beynəlxalq münasibətlər, iqtisadi inkişaf, nəqliyyat-logistika layihələri, hərbi quruculuq və idarəetmə məsələləri ilə yanaşı, milli-mənəvi dəyərlərə dair prinsipial mövqeyini də aydın şəkildə ifadə etdi. Xüsusilə ana dili ilə bağlı səsləndirilən fikirlər cəmiyyətin bütün təbəqələri üçün aydın və ünvanlı mesaj xarakteri daşıdı. Prezident qətiyyətlə bildirdi ki, dil dövlətçiliyin əsas atributudur və milli kimliyin davamlılığı birbaşa ana dilinin saflığı və qorunması ilə bağlıdır.

Prezidentin Azərbaycan dilində səlis, zəngin və yerində istifadə olunan ifadələrlə çıxış etməsi təsadüfi deyil. Onun nitq mədəniyyəti, xalq dilindən gələn sözlərə verdiyi dəyər xüsusilə gənc nəsil üçün etibarlı və nümunəvi modeldir. Xarici sözlərin nəzarətsiz və məqsədsiz istifadəsinin dili zənginləşdirmədiyini, əksinə, milli kimliyi tədricən aşındırdığını açıq şəkildə ifadə edən dövlət başçısı bu məsələdə xüsusi məsuliyyətin jurnalistlərin, ziyalıların və ictimai rəy formalaşdıran şəxslərin üzərinə düşdüyünü diqqətə çatdırdı.

Müsahibənin emosional və ideoloji yükünü artıran əsas məqamlardan biri də Vətən, torpaq və Qarabağla bağlı səsləndirilən fikirlər oldu. Prezident azad edilmiş ərazilərə artıq fərqli baxış bucağının formalaşdığını, həmin torpaqların bərpa, dirçəliş və dayanıqlı inkişaf mərhələsinə qədəm qoyduğunu strateji baxımdan əsaslandırdı. Qarabağ və Şərqi Zəngəzurun təbii, iqtisadi və geosiyasi potensialı ilə bağlı fikirlər Azərbaycanın gələcəyinə yönəlik aydın və sistemli vizyonu nümayiş etdirdi.

Müsahibə zamanı sualları ilə seçilən jurnalist Mirşahin Ağayev ana dili və Vətən mövzularında dialoqa xüsusi səmimiyyət və dərinlik qatdı. Bu dialoq bir daha sübut etdi ki, ana dilinin qorunması yalnız mədəni məsələ deyil, milli ideologiyanın və dövlətçilik fəlsəfəsinin əsas sütunlarından biridir.

Prezident İlham Əliyevin ana dili ilə bağlı səsləndirdiyi fikirlər sadə çağırış deyil, strateji mahiyyət daşıyan ciddi xəbərdarlıqdır: dil qorunarsa, millət qorunar, millət qorunarsa, dövlətçilik möhkəmlənər. Bu yanaşma Azərbaycan cəmiyyətinin uzunmüddətli inkişafını müəyyən edən əsas inkişaf xətti kimi qəbul olunmalıdır.

Cəmilə Çiçək

Prezident təqaüdçüsü,

Zekainfo.az saytının baş redaktoru