ALLAH, SƏN SAXLA: YAS-YASA QARIŞIB!
Həyat müəllimimiz, əmimiz İsa Lələkişiyevin ömrünün
sonuncu aşırımında dayanıb üzügeri, kəlbəcərli günlərinə boylandıq...
...Onun haqqında bəlkə də ilk dəfədir yazılır. Çünki
diqqəti çəkmək üçün “mən də varam”,-deyənlərdən olmayıb, baxmayaraq ki,
minlərlə yetişdirdiyi, doğma ana dilini öyrətdiyi, kövrək və titrək
barmaqlardan tutub, birincilərə “ƏLİFBA”nın hərflərini yazdırdığı şagirdlərinin
bircəsindən bircə cümlə özü barədə fikir ummayıb.
Azərbaycan xalqı sevimli övladları ilə fəxr edib
həmişə. Bu gün isə biz daha çox Vətənimizin ərazilərinin düşmən tapdağından
azad edilməsində canından-qanından keçən şəhidlərimizlə daha çox qürur duyuruq.
Lakin bu, o demək deyil ki, xalqımızın, dövlətimizin inkişafında, vətəndaşlarının
vətənə layiq tərbiyə və təhsil almasında özünün zehni əməyini əsirgəməyən
müəllimlər ordusunu unutmalıyıq. Qətiyyən belə deyil.
Müəllim! Şərəfli və bəlkə də müqəddəslərdən müqqəddəs
bir peçə! Bu ad üçün ali təhsil almayanlara da müəllim deyilir, əlbəttə,
höprmət mənasında, bu, doğru qarşılanmasa da. Ona görə ki, ən şərəfli addır.
Hər kəsə müəllim demək olmur. Lakin, digər ixtisas-peşə sahibləri vəzifəyə
keçdikdən sonra onlara “müəllim” deyə müraciət edirlər.
Ailənin ağırlığını daşıyan balalar.
Müəllimlərimiz bizim üçün örnək, nümunə və
ata-ana qədər (bəlkə də onlardan artıq) doğma və əzizdirlər.
Belə müəllimlərimizdən biri də Kəlbəcər
rayonunun Otaqlı kəndində 1939-cu ildə ulu bir nəslin (Səfərlər) ocağında
dünyaya göz açmış İsa İbrahim oğlu Lələkişiyev idi. Bu ailədə iki qardaş (İsa
və Alməmməd) və Çiçəklə Yazgül adlı iki bacı dünyaya gəlmişdi. İbrahim ata
1941-45-ci illər müharibəsinə aparıldığı üçün ailənin bütün ağırlığı uşaqların
anası Əsli nənənin çiyinlərinə düşmüşdü.
Bu, bir yazılmamış tarixdir. Əsli nənənin
balaları da buna görə uşaqlıq illərini yaşamadılar: gecələr onun toxuduğu
xalça-palaza kömək etdilər, gündüzlər isə kolxozda çalışdılar ki, dolanışıq
qursunlar. Ailənin ağırlığını daşıyan balalar özlərinin qayğılarını çəkə
bilməsələr də, oxumaq, bir yana çıxmağa və anaya daha çox kömək etməyə
çalışırdılar.
İsa ailədə uşaqların böyüyü idi. Ona görə də
yaşına uyğun olma sa da, təsərrüfat işlərində anasına kömək etməklə yanaşı,
oxumağı da unutmurdu. Ona görə orta məktəbi əla qiymətlərlə bitirib, ibtidai
sinif müəllimliyinə (Ağdam Pedaqoji Texnikumuna) qəbul oldu. Orta-ixtisas
təhsilli müəllim kimi Kəlbəcərə dönəndə, əlbəttə, ən çox sevinən ağzından
yaşmağı enməyən anası Əsli nənə, bacıları Çiçəklə Yazgül, qardaşı Alməmməd
olmuşdu.
İsa Lələkişiyevin təyinatını Kəlbəcərin ucqar
kəndlərindən olan Şurtana, daha sonra isə Həsənlərlə Yellicə kəndlərinə
vermişdilər. Hər üç yaşayış məntəqəsindəki məktəbyaşlıların sevimlisinə
çevrilən İsa müəllim sonralar doğma kəndinin balalarına dərs deyirdi. Müəllimlik
kimi şərəfli peşədə çalışmaqla yanaşı, o, ali təhsil almağı da unutmadı:
Azərbaycan Dövlət Pedaqoji İnsititutunda qiyabi təhsil aldı. Bu, onun ən ülvi
arzularından biri idi.
Müəllimlik şərəfli peşə olduğu qədər də çətin
idi. Çünki hələ iyirminci yüzillikdə elmə-təhsilə maraq ucqarlarda bir o qədər
yaxşı deyildi. Uşaqlar, xüsusən də qızlar məktəblərdən, oxumaqdan uzaq
düşmüşdülər, çünki aclıq illəri olduğuna görə, onları da təsərrüfatlarda işə
cəlb edirdilər ki, ailənin dolanışığına kömək olsunlar.
Beləliklə, İsa Lələkişiyev doğma kəndi
Otaqlıda da ibtidai sinif şagirdlərinin sevimlisinə çevrildi. Bu gün də onun
yetirmələrindən biri olan Əli Şirinov (Otaqlı kənd məktəbində ibtidai sinif
müəllimi) deyir: “İsa müəllimlə Nəcəf Şirinovun arasında “dünyalar qədər fərq
var idi. İsa Lələkişiyev nə qədər mülayim idisə, Nəcəf müəllim, əksinə, bir o
qədər ciddi, ilk görünüşdən vahiməli, “uşaqdöyən” kimi tanınırdı... Təbiətən
sakit, mülayim, fağır...
bir qarışqa belə ayaqlamayan, səsinin yüksək tonu eşidilməyən bəstəboy
ziyalı...
İsa müəllimgilin evi kəndin mərkəzindəki
tarixi alban abidəsi olan “Evdamı”nın ikiaddımlığında idi. Ata tərəfi həmin
tarixi alban məbədində dünyaya göz açan Səfərlər nəslindən idi. Kənd məscidinin
sahibi olan Məşədi Atakişinin qardaşı Lələkişinin nəvələri idilər bu ailədə
dünyaya göz açanlar.
İsa müəllimin qardaşı Alməmməd Lələkişiyevi
də kənd uşaqları, daha doğrusu, onların valideynləri çox istəyirdilər. Təkcə
ona görə yox ki, o, kitabsevər kimi tanınırdı. Uzun illər Otaqlı kənd kitabxanasının
müdiri işləyən Alməmməd İbrahim oğlu həm də, qardaşı İsa müəllim kimi, təbiətən
sakit, mülayim, fağır, bir qarışqa belə ayaqlamayan, səsinin yüksək tonu
eşidilməyən bəstəboy ziyalı idi. Həmsöhbət olanda hər iki qardaşın savadına,
ziyalılığına qibtə edənlərimiz az deyildi.
Bəli, biz iki qardaşın da kitaba, elmə olan
marağını ilk vaxtlardan Alməmməd əmi oyatmışdı. Kitabxananın kitabları sanki
bizim şəxsi sərvətimiz idi. Alməmməd əmidən öncə illər uzunu bu kitabxananın
müdiri anamız Güllər Məmməd qızı olduğundan, elə bilirdik ki, oradakı kitablar
bizə məxsusdur. Məhz bu sevgiyə görə də qaçqınlıq-köçkünlük illərində
kitabxanın yaşadılması, fəaliyyətini dayandırmaması üçün şəxsi kitabxanamızdan
bu məbədə min nüsxədən artıq dəyərli nəşrlər hədiyyə eləmişdik.
Təəssüf ki, bu günlərdə eşidirik ki,
kitabxananın fəaliyyətinə kimlərsə xitam verib. Bəhanə də o olub ki, kitabxana
binası yoxdur. Məgər məcburi köçkünlərimizin özlərinin şəxsi həyətyanı sahəsi
olan evləri var ki, kitabxana üçün də bina tikilsin?! Absurd bir yanaşma,
sadəcə, bəhanə...
Alməmməd əminin iki oğlu (şair təbli, gözəl
şeirlər müəllifi Rəsulla, məktəb direktoru Vüsal müəllim də ataları kimi, təkcə
kəndimizin yurdundan perik düşmüş camaatının yox, hətta rayonumuzda və
respublikada sayılıb-seçilən ziyalılar kimi tanınırlar.
...İllər qovhaqovdadı. Kəlbəcərdən didərgin
salındığımız və məcburi köçkün kimi orda-burda müvəqqəti məskunlaşdığımız
illərdə bu ailə də itkilərlə üzləşdi. Ondan öncə isə İsa müəllimin bacısı Çiçək
xala yeganə oğlu Hidayəti ermənilər girov götürüb, 31 gün əsirikdə minbir zülm
verdiyi vaxtlarda ölüb-dirildi. Buna görə də dözmədi-qəribməzar oldu. Yazgül
bacısı da təkcə balası olan Kifayəti qardaşlarına tapşırıb, bu vəfasız dünyadan
bezib getdi. Alməmməd əmi balalarının əlinin çörəyə çatdığı vaxtlarda - ali
təhsil alıb müəllimliyə başlayanda əlvida dedi doğmalarına.
Bu da son: qara karvan, tabut altdakı kövrək çiyin
və...
İsa müəllim “yaşayırdı”, əgər buna yaşamaq demək
mümkün idisə. Ömrünün son illərini yataqxanalarda yataq xəstəsi olan İsa
müəllimin ömür-gün yoldaşı Məleykə xanım ailənin bütün qayğılarını öz kövrək
çiyinlərinə götürmüşdü, Əsli nənə kimi...
Yeganə oğlu Bəxtiyarla qızları Ülviyyə, Sahilə və
Sevinc ata-anaya olan övladlıq borcunu layiqincə yerinə yetirirlər. Üzləri ağ
olsun!
...Bu da son. Yox, hər şeyin sonu deyil. Bir ömrün
80-ci aşırımıdır. Qardaş-bacılardan yadigar qalan, qaçqınlıq-köçkünlük
illərinin də ağrı-acısını sınıq könlündə birtəhər daşıyan, amma Kəlbəcərinə
qovuşmağa ömrü vəfa etməyən İsa müəllimin qara karvanı son mənzilə, Göygöl
rayonunun Aşıqlı kənd qəbristanlığına üz tutmuşdu. Orada onun doğmaları,
kəndçiləri uyuyurdu axı. Nəsihəti də bu olmuşdu: “...Məni əmim Nərimanın,
gəlinbacım Güllərin, bacılarım Çiçəklə Yazgülün yanında dəfn edin...”
Sanki o gün göylər də qan ağlayırdı qız balaları -
Ülviyyə, Sahilə, Sevinc kimi. Bəxtiyar qardaşı ilə yanaşı, tabutu çiyinlərində
aparanların arasında Ülviyyəni də görmək dəhşət idi! Bu, ata-anaya övlad
sevgisinin kulminasiyası - zirvəsi idi.
...Ömrünün son günlərini yaşayan İsa əmiyə baş çəkməyə
getmişdik. Yataqda olsa da, onu ziyarət etməyə getdiyimiz üçün qalxıb yasdığa
söykəndi. Həmişəki kimi, uzaqdan başladı söhbətə. Səs də elə həminki idi: zorla
eşidiləcək qədər.
Yaddaşı heç zəifləməmişdi, özü “ bir dəri, bir sümük
qalan” əmimizin. Gözləri zillənmişdi ağlar baxışlarımıza. İstəyirdi ki,
kəlbəcərli günləri xatırlasın. Amma, yox, bizi ağlatmaq da istəmirdi. Zorla
eşidiləcək səslə aram-aram dilləndi:
-Məhəmməd, İbrahimi atamız bilmişik, səni də əmi.
Sizinlə fəxr edirəm. Sizin bir deyişmənizi o gün Ülviyyə mənə oxudu. Maşallah,
gəlinbacım kimi siz də gözəl ruha maliksiniz. Fəxr edirəm ki, nəslimizdə sizin
kimi istedadlı və qohumcanlı, yurda bağlı oğullar, qardaşlar az deyil.
İbrahimlə Rəsulun şeirləri ürək döyüntülərimdir. Saz olsaydı, çalardın, qarmonu
yaxşı çalırdın, səsin də zil idi...
Xəyal bizi uzaqlara aparmışdı: bizim uşaqlıq, onun isə
gənclik illərinə. İsa əmi bizim evdə saz çalırdı. Sazın səsi də özününkü kimi,
çox zərif və zəif idi.
Anamın ruhunu tərpətmişdi deyəsən. Ona görə də sazın
həzin səsinə uyğun elə o tonda, sakitcə:
-İsa müəllim, nolar, sazı elə çal ki, səsini
eşidək,-deyəndə o, başını sazın sinəsindən qaldırıb. Təbəssümlə üzümüzə baxıb
özünəməxsus tərzdə dilləndi:
-Sazın simləri də könül kimidir, gəlinbacı, sındırmaq
olmaz. Sazın səsi ruhun qidasıdır. Sazı qışqırtmaq, dəli kimi çalmaq olmaz.
Sazın səsini ruhuna, canına hopdurmalısan. Barmaqlar simlərə, pərdələrə sığal
çəkməlidir, yoxsa saz saz olmazdı ki...
İlk dəfə idi ki, sazı bala kimi qucağında əzizləyən
görürdük. ...İllərin o tayından xatirə kimi boylanan həmin günlər yaddaşımızı
təzələdi.
Biz İsa müəllimin istədiyi həmin deyişməni dedikcə,
gözlərindən süzülən yaş, yanaqlarından iz açırdı. Nə yaxşı ki, Ülviyyə balamız
özünü yetirdi:
-Atamı biz belə ağlatmamışdıq, ay əmi, vallah...
Məhəmməd
Nərimanoğlu,
İbrahim
Səfərlər