Orta məktəbdə bir ədəbiyyat müəllimimiz vardı. Bir az yaşlı idi,
saçlarına təzəcə dən düşmüşdü. Yadda qalmağının, sevilməyinin səbəbi həmişə şagirdlərinə
əlindən gələn köməyi etməsi, onlara pasiban durması idi.
Həmid müəllim dərs başlayan kimi sual-cavab edər, kimin nəyə qadir
oldugunu biləndən sonra jurnala qiymət yazar, yeni dərsin tapşırıqlarını verər,
sonra yadda qalan tərbiyəvi hadisələrdən danışardı. Deyərdi ki, şagirdlərin
oxuyanı da olar, oxumayanı da. Oxumaq istəyənin qarşısını heç kim kəsə bilməz.
Oxumaq su içmək kimi bir şeydir. Amma insanlıq dərsini oxumaq hər
adama müyəssər olmur. Bunun dərsliyi yoxdur. Vətənini, xalqını sevmək, insan
olmaq dərsliyi müəllimin ürəyinin baş hissəsində, bir də şagirdlərın qulağının
dibində yerləşir.
Bir dəfə yenə Həmid müəllim şahidi olduğu bir hadisəni danışmağa
başladı:
Kəndimizdə bir ailə vardı. Kişi gəlmə idi. Cavanlıqda hardansa gəlmişdi.
Kəndə ilk dəfə işıq çəkirdilər. Bir evə işıq çəkən zaman o evdə ürəyinə yatan
bir qızla evlənmişdı. Qızın adı Səmayə idi. Kənd ağsaqqallarının iştirakı ilə
oğlana toy elədilər. Səmayə atasını itirmişdi. Anası ilə birlikdə qaldığından
elə ata yurdunda həmin oğlanla yaşamağa başladı.
Oğlan kənd camaatına qaynayıb-qarışdı. Hörmət qazandı. Adamlar daha
ona “işıqçı oğlan” əvəzinə, İşıqçı Bayram deyirdilər. İşıqçı Bayramla Səmayənin
bir oğlu oldu. Uşaq böyüdü. Məktəbə getdi. Müəllimlər bu uşağa xüsusi qayğı ilə
yanaşırdılar. Fikirləşirdilər ki, Bayram qərib olduğunu heç vaxt ağlına gətirməsin.
Zəhmətkeş ailənin oğlu böyüdü. Məktəbdə çoxlarından fərqləndiyi, yaxşı oxuduğu
üçün elə buraxılış ilində ali məktəbə daxil oldu.
Bu şad xəbər təkcə İşıqçı Bayramı deyil, bütün kənd adamları ilə bərabər
müəllimləri də sevindirdi. Oğullarının fərasəti ailənin qol-qanadını daha geniş
açmasına imkan verdi. Toyuq-cücə, mal-qoyun saxlamağa da başladılar. Əsas məqsədləri
bu idi ki, oğulları Fərman şəhər yerində korluq çəkmədən oxusun, adam cərgəsinə
qoşulsun. Fərman ata-anasının göndərdiyi artıq pulları cib dəftərinə yazarmış.
Beləliklə, Fərman ali məktəbi başa
vurduqdan sonra təyinatla işə göndərildi. Az vaxtda bilik və bacarığı nəticəsində
müfəttiş vəzifəsinə təyin olundu. Bu yüksəlişi kənd əhli bayram elədi. Böyükdən-kiçiyə
kim İşıqçı Bayramı görürdüsə, onu təbrik edir, gözaydınlığı verir, kimi də
pay-püşlə evə gəlir, ailənin sevincinə şərik olurdu. Hamı oğul-uşağına Bayramı
nümunə göstərir, gəlmə adamdır, amma oğlu gör hara yüksəldi, deyirdi.
Bayram çox sevinir, oğlu ilə fəxr
edirdi. Hər ayın başında poçt idarəsinə gedər, oğlunun göndərdiyi pulları alıb
evə, Səmayənin yanına qayıdardı.
Bu minvalla beş il keçdi. Bayram yavaş-yavaş iş qabiliyyətini itirməyə
başladı. Bir dəfə işıq dirəyinə çıxanda yıxıldı. Ayağı dizdən aşağıdan sındı.
Yataqda xeyli yatmalı oldu.
Bir müddət ayağı gipsdə qalsa da, qoltuqağaclarının köməyilə poçt
binasına getdi ki, oğlunun göndərdiyi pulu alsın. Poçtda işləyən qız ona dedi:
– Bayram
əmi, sizə bu dəfə pul yox, məktub gəlib, buyurun, bu kağıza qol çəkin.
Bayram kişi kağıza qol çəkib, cibinə sığışmayan məktubu çətinliklə əlində
tuta-tuta evə gəldi. Səmayə kişinin baxışlarından bir şey anlamadı:
– A
kişi, boyuna qurban olduğumun qazancından pay aldınmı?
Bayram tərs-tərs arvadını süzüb:
– Vallah,
pul yox, əvəzinə bu məktubu verdilər.
Səmayə təkidlə:
– A
kişi, burda nə var ki?.. Qadasın aldığım, yəqin, məktubun içərisinə pulu qoyub
göndərib. Aç, aç görək...
Məktubu açdılar. İçində pul yox idi. Boz kağıza salamsız-kəlamsız
dörd söz yazılmışdı: “Ata-ana, daha givit”. Nə Bayram, nə də Səmayə bu sözdən
bir şey anladılar. Bir-birinin üzünə baxıb, xeyli beləcə dayandılar, sonra
sükutu Səmayə pozdu.
– A kişi, mən bu “givit” sözünü birinci dəfədi eşidirəm. Heç öz
dilimizdə belə bir söz yoxdu. Dayanıb durma, özünü çatdır Həmid müəllimə. Belə
şeyləri ancaq o bilər.
Bayram kişi qıçını güclə çəkə-çəkə özünü məktəbə çatdırdı. Zəng
vurulmuşdu, tənəffüs idi. Dəhliz boyu uşaqlar o baş-bu başa qaçırdılar. Bayram
qoluna qırmızı bağlamış cavana yaxınlaşdı:
– A
bala, bilmirsən, Həmid müəllim hansı sinifdədi?
– Əmi,
indicə müəllimlər otağına getdi.
Bayram kişi elə qapının ağzındaca Həmid müəllimlə üz-üzə gəldi.
– Xeyir
ola, ay Bayram. məktəbə təşrif buyurmağa səni nə vadar edib?
– Müəllim,
elə sizi deyib gəlmişəm, deyiləsi sözüm var.
Həmid müəllim Bayramı içəri aparıb oturmağa yer göstərdi.
– Bir
az gözlə, indi qayıdıram, – dedi. Həmid müəllimin getməyi ilə qayıtmağı bir
oldu.
– Hə,
eşidirəm, – deyib Bayrama baxdı. Bayram qoltuq cibindən qatlanmış məktubu
çıxarıb Həmid müəllimə verdi. Həmid müəllim məktubu açıb ürəyində oxudu.
Qaşlarını çatdı. Alnı qırışdı.
– Ay
nankor övlad, – dedi.
Bayram:
– Ay
müəllim, yoxsa balama bir şeymi oldu? Onu niyə təhqir edirsiniz?
Haçandan-haçana Həmid müəllim “givit” sözünü izah eləməyə başladı.
– “Givit”
borcun başa çatmasına deyilir. Narahat olma, get evə, mütləq bu günlərdə oğlun
sizə baş çəkməyə gələr, inşallah!
– İnşallah!
– deyib Bayram evə gəldi.
Həmid müəllim poçt idarəsinə gedib Fərmana belə bir teleqram vurdu:
“Atanla anan göbələkdən zəhərlənərək ölüblər. Təcili özünü çatdır! İmza: Həmid
müəllim”. Teleqramı yola saldıqdan sonra Həmid müəllim Bayramgilə gəldi. Məsələdən
onları agah eləyib dedi:
– Qapıda gözləyin. Elə ki eşitdiniz oğlunuz gəlir, hərəniz əlinizə
bir çubuq alarsınız və qapının arxasında gizlənərsiniz. Mən də gəlib sizin evdə
mizin başında oturacağam. Mən işarə verəndə işə başlayarsınız.
Bir gündən sonra Fərman maşını ilə kənddə evlərinin qapısında peyda
oldu. Həyətdə mağar görmədi. İrəli gedib giriş qapısını açdı və qonaq otağına
daxil oldu. Baş tərəfdə Həmid müəllimi gördü. Əl vermək istədisə də, Həmid müəllim
əllərini qoynundan çıxarmadı.
– Otur!
Fərman dinməz-söyləməz oturdu. Həmid müəllim Fərmandan gələn məktubu
ona uzadıb:
– Bu
nədi yazmısan? İzah elə görək.
Fərman tələsirdi, istədi əvvəlcə ata-anasından xəbər bilsin. Amma Həmid
müəllimin sərt baxışları ona imkan vermədi, dedi:
– Müəllim, oxuduğum illərdə ata-anamın mənə göndərdiyi pulları dəftərimə
yazırdım. Mən də aldığım pulları işləyəndən sonra geri qaytarmağa başladım.
Oldu başabaş. Bax bu, “givit” deməkdir.
Həmid müəllim yan tərəfə söykədiyi ağacı əlinə aldı, qapının
arxasndan oğlanlarını dinləyən Bayramla Səmayəyə işarə etdi:
– Ə,
vurun, ağlı başına gələnəcən döyün.
–
Xeyli kötək yedikdən sonra Fərman səhvinin böyüklüyünü anladı.
– Qələt
eləmişəm, bir də eləmərəm.
–
Döyənlər əllərini saxladılar. Çubuqları atıb həsrətində olduqları
oğullarını duz kimi yaladılar.
Bəli, Həmid müəllim belə insan idi.
Cəmilə
ÇİÇƏK/zekainfo.az
Prezident mükafatçısı
AJB və AYB-nin üzvü