1941-ci ilin mart ayı idi. Qışın sərt keçməsi özünü elə göstərmişdi
ki, adamlar hələ də yazın girməsinə inanmırdılar. Ağaclar xurustal buz örtüyünə
bürünmüş, yer qar yorğanı altında qalmışdı. Yollarda zəncirli traktorların
açdığı cığırlar donmuş, yol kənarında buzlar dikinə basdırılmış bıçaq kimi
şişmişdi. Bütün bunlara baxmayaraq, kənd cavanları çərşənbələrdə, canfəşanlığı
davam etdirir, Novruz bayramına hazırlaşırdılar.
Həyətdə otdan-alafdan uzaqda
çırpı, şax-şəvəl toplayır, bel dəstəyi kimi olan ağacların bir ucunu
dörd yerə bölur, əski parçaları ilə aralarını doldurub, məftillə möhkəmcə
sarıyırdılar. Ağ neft tapanlar hazır olan lopanı qabaqcadan islağa qoyur. Neft
tapmayanlar da lopanı mazuta batırırdılar. Qızlar öz qardaşlarının köməyinə gəlir,
iri ağacların uc hissələrinə pambıq dolayırdılar.
Bu budaqlar bayram axşamı neftə batırılaraq hündür bir yerdə bərkidilir
və ya bağlanırdı. Budaqdakı neftə batırılmış pambıq yananda ətrafda əsrarəngiz
bir mənzərə yaranırdı. Gecənin qaranlığında yanan şamlar şölə saçır, qarda əks
olunaraq gecəni gündüzə döndərirdi. Son çərşənbə şadlığı başa çatan gün başqa
bir evdə bir şadlığın başlanması gözlənilirdi. Həmin gün kənd cavanlarından
biri Fərman sevib-seçdiyi gözəllər gözəli Gülnazla evlənirdi.
Kənd əhli soyuğa-qara baxmayaraq, üstü örtülü çardağın altında toyda
iştirak edirdilər. Bayram bayrama qarışmışdı. Həzin zurna səsi çoxlarının
sümüyünü oynatdığından adamlar yallı gedirdilər. Həmin gün el şənliyi – toy
başa çatdı. Yeni bir ailə quruldu. İki gənc öz arzusuna qovuşdu. Demək olardı
ki, qanın qaynayan vaxtında qışın ötməsini, bayramların keçməsini belə, hiss
etmədilər.
Məhəbbət şərabı onları elə bihuş eləmişdi ki, bir də ayılanda gördülər,
ətrafdakı yamyaşıl ağaclar dümağ çiçəklərə qərq olub. Qonum-qonşular, qohumlar
bu ailənin ən xoşbəxt ailə olacağına inam bəsləyirdilər. Ona görə ki, ailənin təməli
bayram günlərində qoyulmuşdu.
Fərman evlərindən bir az aralıda yerləşən məktəbdə biologiya müəllimi
işləyirdi. Qabaqcıl şagirdləri cəlb eləməklə özü də gedib meşədən cavan ağac
zoğlarını kökündən çıxararaq gətirib məktəbin hasarı dibində yol boyunca əkdirirdi.
Küçənin başında dağın dibində yerləşən Əhməd kişinin bulağından axan su arxla gəlib
əkilən ağacların dibindən keçir, aşağıda dərəyə tökülürdü. Əkilməsindən bir ay keçməmiş ağaclar göyərib
yarpaqlamağa başladı. Fərman müəllim tutduğu işə görə çox sevinirdi. O,
deyirdi:
– Ağac da insan kimidir. Ağacın da qol-budağı, qohum-əqrabası,
xeyirxahlığı var. Biz əkdik, qoy gələcək
nəsillər xeyrini görsün, kölgəsində dincəlsin.
Günlərin birində Fərman evə qayıdanda həyətinin gülü-gülüstanı olan
Gülnaz onu təbəssümlə qarşıladı. Fərman ətrafa
göz gəzdirdi. Gəlib – eləyən yox idi. Dedi:
– Sevgilim, təbbəsüm sənə nə gözəl yaraşır. Sən həmişə gülümsə ki,
övladlarımız da, sənə oxşasın, gözəl olsun.
Gülnaz ərini bərkə-boşa çəkmək istəmədi:
– Əzizim,
bizim uşağımız olacaq.
Fərman qollarını geniş açaraq onu qucaqlayıb, başı üstünə qaldırdı:
– Mənim həyatım! Mənim eşqim! Mənim məhəbbətim! Yaşa səni! Yaşa səni!
Deyib Gülnazı özü bərabəri endirdi. Başını qucaqlayıb, o üzündən – bu üzündən
öpdü.
Onlar beləcə şad-xürrəm ömür sürdükləri bir zamanda bir gün səhər
tezdən hamını dəhşətə gətirən xəbər bütün kəndə yayıldı. Camaat kəndin mərkəzinə
doğru qaçırdı. Məktəbdə dərs dayanmış, zəng susmuşdu.
Alman faşistləri ölkəmizə təcavüz etmişdilər. Hər kəsin üzündə təbəssüm
yoxa çıxmışdı. Atalar-analar bir anda yüz ilin qocasına dönmüşdü. Gözlərinə
qara su enmişdi. Bu bəd xəbər nəticəsində yanıb, cızdağı çıxanlardan biri də
Gülnaz idi. Axı, onun əri də müharibəyə getməli olacaqdı. Bax beləcə, müharibə
kənd cavanlarının yaşı düşənlərini süpürgə kimi süpürüb apardı. Fərman da o
süpürgənin qabağına düşdü. Əyninə hərbi formanı geyinəndə gözləri yaşardı. Amma
özünü toparlayıb, yalandan gülümsəməyə çalışdı:
– Sevgilim, məndən narahat olma. Uşağımızdan muğayat ol. Övladımızın
xatirinə, sənin xatirinə mütləq qayıdacağam.
Bu, Fərmanın, son sözləri oldu. Kənddə qalan qocalar, uşaqlar, xəstələr,
şikəstlər, bir də “oğlum” deyib heygirən analar və qız - gəlinlər oldu. Bundan
sonra taqəti olan da, olmayan da, əkib becərməyə girişdi. Kənddə taxıl tədarükü
başlandı. Müharibəyə göndərilən paydan sonra hərəyə bir ovuc buğda düşdü. Yayın
isti, qaynar günləri arxada qaldı.
İndi payız küləkli, yağışlı havaları ilə insanların canına üşütmə
salırdı. Gülnaz da qışa hazırlıq görürdü. Bu işdə ona qayınlarının və
qardaş-bacılarının uşaqları kömək edirdilər. Gülnazı bir an belə tək buraxmır,
gözdən qoymurdular.
Vaxt-vədə dolandı, Gülnazın gözəl-göyçək bir oğlu dünyaya gəldi.
Adını Zəfər qoydular. Zəfər üç aylıq olandan sonra Gülnaz oğlunun xatirinə,
daha çox işləyirdi. Hətta boş tövləyə bir inək də alıb bağladı. Quş qanadlı
aylar bir-birini əvəz eləməyə başladı. Zəfər oturub qığıldayanda Fərmandan məktub gəldi: “Əzizim, darıxma, uşağımızdan muğayat ol, bu əclafları məhv edən kimi geri dönəcəyəm”
Müharibənin qızğın çağlarında Fərmandan bir neçə məktub da gəldı. 1945-ci
ilin mart ayında Fərmanla Gülnazın evlənməsinin ildönümündə müharibədən gələn
şad xəbərlər hamıda ruh yüksəkliyi yaratdı. Faşistlər ölkəmizdən qovulurdu.
Nəhayət, Qələbə çalındı. Qalib əsgərlərimiz evə dönməyə başladılar. Amma itkilər də çox olmuşdu. Qayıdanlardan
kiminin bir ayağı, kiminin bir qolu,
kiminsə əli yox id. Kiminin də heç yeri-yurdu bilinmirdi.
Qara kağız gələnə gəldi, gəlməyən də içini çəkdi, susdu. Gözləri
yollarda qaldı. Ondardan biri də Gülnaz və oğlu Zəfər idi. Fərmandan xəbər-ətər
bilmirdilər. Qara günü ilə barışan Gülnaz bircə ciyərparasını böyütməyə
başladı. Bu işdə müharibədən qayıdan qayınları, qardaşları ona yardım elədilər.
Əmiləri və dayıları elə isti münasibət göstərdilər ki, Zəfər özünün yetim
olduğunu hiss eləmədi. Bir şeylə fəxr elədi ki, onun atası müharibədə həlak
olmuşdur. Zəfər böyüdü. Məktəbi
qurtardı. Ali məktəbə daxil oldu. Təhsilini başa vurandan sonra evlənib şəhərdə
qaldı.
Dəfələrlə təkid etsə də, anası ər evini, yurdunu buraxmayacağını söylədi.
Dul qalan qadına evlilik təklif edənlər də tapıldı. Gülnaz onların hamısını rədd
elədi. Ərini gözlədi. Günlərin birində poçtalyon məktub gətirdi. Məktub böyük
olduğundan üstü qəribə şəkilli markalarla dolu idi.
Gülnaz qarışıq düşüncələr içində zərfi açdı. Məktub demək olar ki, ağ
kağızdan ibarət idi. Amma ortasında bu
sözlər yazılmışdı:
– Mən sağam.
Bu iki söz özünü dünyalarca xoşbəxt hiss etmək üçün Gülnaza kifayət
idi. Deməli, əri ölməyib, o sağdır. Şad xəbəri hamı eşitdi. Qayınları və qardaşları
sevincdən ailəli-uşaqlı onun evinə toplaşdılar. Məktubu müzakirə etdilər.
Ünvansız, iki kəlməlik məktub birini deyir, qalanını demirdi. Onsuz
da tənhalığa öyrəşən Gülnaz ərini gözləməkdən gözlərinin kökü saraldı. Naməlum
məktubdan sonra heç bir səs-soraq çıxmadı. Yazıq qadın evə də girmir, divarın
dibində taxtadan düzəldilən skamyada elə hey oturur, otururdu.
Vaxtı ilə ərinin əkdiyi, artıq böyümüş olan ağaclara tamaşa edə-edə
günləri başa vururdu. Bir gün də kəndə xəbər yayıldı ki, Gülnaz arvad oturduğu
skamyanın üstündə keçinib.
Fərman kəndə gəlib çıxanda onun sevimli Gülnazının qırx mərasimini təzəcə
yola vermişdilər. Camaat həyətdəki qara çadırı sökməklə məşğul idi...
Cəmilə ÇİÇƏK/zekainfo.az
Prezident
təqaüdçüsü,
AYB və
AJB-nin üzvü