Evin tək
oğulu, elin, xalqın sevimlisi Orxan haqqında bilmədiklərimizdən bəzi məqamlar
doğmaların, dostların dilində
Ata-oğul
döyüşçü, şəhid, qazilər haqqında kifayət qədər əlimizdə faktlar, ətrafımızda
onları uzaqdan-yaxından tanıyanlar var...
30 ilə yaxın
idi ki, Qarabağ dərdi xalqımızın ürəyində sağalmaz yaraya çevrilmişdi. Bunun
səbəbləri az deyildi. Ən əsası da qorxaq, qonşu malına, torpağına, daşına belə
göz dikən daşnakların ikiüzlülüyü nəticəsində tarixi ata-baba yurdlarımızı
itirməyimiz bizi dünyada gözükölgəli etmişdi. Çünki ikili siyasət yürüdən
beynəlxalq birlik, xüsusən də münaqişənin sülh yolu ilə aradan qaldırılmasına,
guya, xidmət göstərən ATƏT-in Minsk qrupunun bizə - işğala məruz qalan tərəfə
ögey münasibəti, erməni xislətli olması bizi yandırıb-yaxır, maddi sərvətimizi
talamaqları bir yana, mənəvi terrora da məruz qalımışdıq.
Nə yaxşı ki,
artıq iki ildir bu əzabdan qurtulmuşuq. Bu Qələbəni bizə yaşadan isə başda Müzəffər Ali Baş Komandan İlham Əliyev
olmaqla, Azərbaycan Ordusu, onun sıralarında xidmət göstərib daşnakların canına
vəl-vələ salan cəsur oğullarımız, o cümlədən Orxan kimi şəhidlərimiz oldu.
Şəhidlərimizin
əbədiyaşarlığı onların tanıdılmasından da çox asılıdır. Məhz gələcək nəsillərə
nümunə olacaq igidlərimizin şərəfli ömür və döyüş yollarına işıq salmaq isə
qələm və söz adamlarının borcudur.
Yolumuzu şəhid Orxan
Səfiyar oğlu Mönsümzadənin doğmalarının yanından saldıq və atası Səfiyar Mönsümzadəni dinlədik: “...Orxan mən birinci Qarabağ
müharibəsində döyüşdə olan vaxtı dünyaya gəlib. Bir gün mən döyüşdən qayıtdım.
Bacım Orxanı qucağıma verəndə körpə məni tanımadı, ağlamağa başladı...
Biz qaçqın - köçkünlük illərində kasıbçılıqla
yaşamışıq, amma, buna baxmayaraq, Orxan çox əliaçıq bir uşaq idi. Əlində bir
parça çörək belə olsa, onu dostlarıyla bölüşərdi. O, ailəsinə, vətəninə bağlı
bir şəxsiyyət kimi böyüdü. O, çox istiqanlı, səxavətli, dostcanlı, böyük-kiçiyin
yerini bilən, sözün əsil mənasında, əsil insan, əsl igid, şəxsiyyət idi.
Orxan hələ orta məktəbdə
oxuyanda bir dəfə Bərdədəki Şəhidlər xiyabanına getmişdik, mənə belə bir sual verdi:
Ata, buradakılar kimdir?
Dedim:
- Burada yatan əsgərlər
90-cı illərdə Qarabağ uğrunda döyüşüb şəhid olan oğullardı.
Yenə sual verdi:
-
Ata,
bəs torpaqları niyə azad etmədiniz?
-
Mən
onda ona heç bir cavab verə bilmədim. Orxan hər dəfə o sualı verirdi, sanki
bugün üçün böyüyürdü. Orxanla mən sanki ata-bala yox, dost, yoldaş, sirdaş
idik. Hər hansı bir iş görməmişdən əvvəl mənimlə məsləhətləşərdi. Təkcə oğlumu
deyil, dostumu, sirdaşımı itirdim. Bəzən öz-özümə deyirəm ki, kaş ki, mən birinci
Qarabağ savaşında döyüşərkən şəhid olaydım, amma Orxan yaşayaydı. Sonra da
düşünürəm ki, Orxan “atamın qisasını almalıyam”, - deyib yenə də döyüşə
gedəcəkdi. Orxan məhz belə bir qorxmaz oğul idi.
Atam da 1941-45-ci illərin
veteranı idi. Oğlum bir nəslin davamçısı oldu... Orxan topçu idi. Düz 9 il
Qarabağın müdafiəsində qüsursuz xidmət etdi. “Aprel döyüşləri”ndə - dörd günlük
müharibədə fəal iştirak edərək xüsusi qəhrəmanlıqlar göstərdi.
Ümumiyyətlə, Orxan işiylə
bağlı evdə bir söz demirdi. Doğrusu, 2016-ci il “Aprel döyüşləri”ndən sonra
dedim ki, ordudan çıx, başqa işlə məşğul ol. Amma o, əqidəsindən dönməyib dedi:
- Ata, işimi sevirəm,
torpaqlarımız da işğal altındadır, mən ordudan çıxa bilmərəm! Yaxşı, bəs Vətəni
kim qorumalı, işğalda qalan torpaqlarımızı düşmən əsarətindən çıxarmaq üçün
səfərbər olan oğulların ata-anası yoxdurmu?
Evin tək oğlu idi. Mən özüm təsəvvür eləməzdim
ki, nə vaxtsa müharibə olacaq. Mən onu yolundan döndərə bilmədim. Kəlbəcəri
görməmişdi, amma Murovdağ yüksəkliyi alınanda məndən muştuluq istədi.
Orxan vətən, torpaq üçün
doğulmuşdu. Orxanın topu nə “Aprel döyüşləri”ndə, nə də ikinci Qarabağ
müharibəsi dövrü susmadı. Ermənilər Orxanın səngərini bilərək nişan almışdılar.
28-i gecəsi mərmi düşdüyü vaxt Orxanla bərabər daha 3 əsgərimiz şəhid oldu. Bu
haqda Orxanın əsgəri ilə danışmışdım. Dedi ki, "əmi, Orxan bizi blindaja
saldı və dedi ki, burdan çıxmayın! Amma özü top atırdı. Bizi qorudu, şəhid
oldu...
Cəyirli kənd
qəbristanlığında dəfn olunub.
Azərbaycanın Ağdam
rayonunun işğaldan azad edilməsi uğrunda aparılan döyüş əməliyyatlarına
qatılaraq şəxsi igidliyi və şücaəti nümayiş etdirdiyinə görə Azərbaycan
Respublikası Prezidenti İlham Əliyevin müvafiq sərəncamları ilə (ölümündən
sonra) “Vətən uğrunda” və “Ağdamın azad olunmasına görə” medalları ilə təltif
edilib.
Orxan şəhid olanda
diviziya komandiri "vuran qolumu sındırdılar", - demişdi. Orxan topu
kəndirlə deyil, həmişə əliylə atardı. O, şəhid olandan sonra qərargah rəisini
Orxanın yerinə göndərmişdilər. Fəxr edirəm ki, belə qorxmaz igid bir oğulun
atasıyam...”
Şəhidin anası Zemfira
Mönsümzadə “Orxanı çadır şəhərciyində əzab-əziyyətlərlə, palçığın, bataqlığın,
yayın qızmar istisində, qışın sərt soyuğunda yarıac-yarıtox böyütmüşəm”, -
deyir: “ Köçkün ailədə böyüyüb balam. 18 metr eni olan “Qarabağ kanalı” çadır
şəhərciyinin yaxınlığından keçirdi. Həmişə onu sudan qoruyardım, düşüb boğular
deyə, çox qorxurdum. Amma o balaca canı ilə bizdən gizlin gedib çimib, üzüb
keçərdi kanalın o biri tərəfinə. Qorxusu yox idi. Kiçik yaşlarında balıq
tutmağa çox həvəsli idi.
Bir gün öz yoldaşı ilə
qışqıra-qışqıra gəlmişdi evə. Elə bildim nəsə olub, sən demə, kanaldan tutduğu
balıqları gətirirmiş sevincək. Uşaq vaxtı bərk xəstələnmişdi, yanımızda həkim
olmadığından, qonşu kəndə kürəyimdə apardım. Yol çox uzun idi, bunu həmişə də
Orxana xatırladırdım: “...sən də məni qocalanda bu cür - kürəyinə alıb
gəzdirərsən”. Onda gülərək mənə belə cavab vermişdi:
- Mən sənin kimi
olmuyacam ki. Taksiylə,
avtomobillə aparacam istədiyin yerə...
O günləri görmək mənə qismət
olmadı. Əsgərlikdə kiçik çavuş idi. Bir gün zəng vurub dedi:
-
Ana,
mən nə edim ki, temperaturam düşsün?
Dedim:
Can bala, ilıq su ilə
bədənini sil, yaxşı olacaqsan...
Oğlum hər kəsə qarşı çox
qayğıkeş, mərhəmətli olub. Top komandiri kimi işə başlayanda iş yeri evə yaxın
idi. Şirniyyatı çox sevərdi, yeməyi belə evdə yeyərdi. Bişirdiyim şirniyyatdan
həmişə əsgərlərinə pay aparardı. İstirahət vaxtlarında da daha çox işdə olardı. Ana kimi mən də oğlumun xoşbəxt
olmağını gözləyirdim. Nişan aparmışdıq, toya hazırlaşırdıq. Bilməzdim ki, 17
sentyabr onun üçün keçirəcəyim sonuncu ad günü olacaq...
Ad günündə “mənə nə
almısan”, - soruşanda boynunu qucaqlayıb, üz-gözündən öpüb “sənin hədiyyən
budu”, - dedim. Qızım o anı telefona çəkib. Onunla çəkdirdiyim həmin foto son
xatirə şəklimiz oldu...
25 sentyabrda nişanlısının
ad gününü qeyd etdik, bütün qohumlar bir yerdə idik. O gün də son xoşbəxt
olduğumuz gün imiş...
Axırıncı dəfə Orxan 26-da
gecə evə gəlmişdi. Döyüşə hazırlıqlı olduqları üçün torpağın üstündə
yatırdılar. Bərk soyuqlamışdı. “Ana, məni bankala, gedirəm,” - dedi. Onu
gördüyüm, qucaqlaşdığım, qoxusunu içimə çəkdiyim sonuncu gecə oldu...
Orxan “Aprel döyüşləri”ndə
də iştirak etmişdi. Müharibənin nə demek olduğunu bilirdi, təcrübəsi var idi.
Təsəvvür etməzdim ki, Orxana nəsə olar. Həmişə ona bir şey olanda yuxuma
girirdi, agah olurdu mənə. Amma bu dəfə sanki Allah əl-qolumu bağladı. Biz
Orxana yalan danışıb demişdik ki, Bərdədəyik. Çünki “biz burdayıq”, - deyəndə
o, narahat olurdu. Mən balamın adını
yaşatmaq üçün yaşayıram, onsuz həyat mənim üçün heç nədi...”
Şəhidin bacısı Şəbinə
qardaşı Orxandan yaşca böyük olub. Ona görə də bacısı deyir ki, o, uşaqlıqdan
məni qoruyub, arxa-dayaq olub, hər zaman
qayğıma qalır, “ürəyin nə istəyirsə de, mən tapıb gətirəcəm sənə”, - deyirdi.
İstəyirdi ki, hər şeyim olsun. Ad günlərimdə özündə olmasa belə hardansa pul
tapıb mənə hədiyyələr alardı.
Yadımdadır, təzə-təzə
insanlar smartfon telefon işlədən vaxtları gözləmədiyim bir anda gördüm
telefonuma mesaj gəldi. Baxdım ki, kontur yükləyib. Çox əliaçıq idi. Heç nədən
əskikliyimiz olmasını istəməzdi. Orxan nəinki bizə, dostlarına, dəyər verdiyi
insanlara qarşı ölümə gedərdi. Tanıyanlar deyirdi ki, kaş, bizim də qardaşımız
səninki kimi olaydı.
...O günlər üçün çox
darıxıram. Orxanla 26-si gecəsi görüşdük. Qapıdan çıxanda “qəhrəmanlıq eləmə,
özünü qoru”, - demişdim. 27-si səhəri müharibə başlayanda müvəqqəti evdən
çıxmaq məcburiyyətində qaldıq. Çünkü ermənilər yaşayış yerlərinə zərbələr
endirirdi. Müvəqqəti Ağdamın Quzanlı qəsəbəsinə getdik. Orxan təkidlə tələb
etdi ki, “Ağdamdan çıxın, bu, əvvəlki müharibə kimi deyil”.
Biz yenə də getmədik.
Tez-tez zəng vururdu. Gördü ki, mümkün deyil, atam getmək istəmir. Mənimlə
danışdı: “Bacı, heç olmasa, sən de ki, qorxuram, getmək istəyirəm, de... məcbur
et, evdən çıxsınlar".
Biz heç vaxt nə müharibədən,
nə ölümdən, nə də nankor ermənidən qorxmamışıq. Qardaşım da, mən də, ailəmiz də
belə görmüşük.
Orxanla sonuncu danışığım o
gün oldu. Atamgil məni 29-u gecəsi məcburi surətdə Bərdəyə göndərdi. Həmin
gecəni xatırlayanda sanki o günü təkrar yaşayırmış kimi oluram. Anamın fəryadı
hələ də qulağımdadı. Şoka düşmüşdüm, inanmırdım. Mən tabut gələnə qədər
“yaralı” təsəvvür edirdim. Ümidli idim ki, o, yaralı qayıdacaq. Amma bayraq
qapıya asılanda, tabut evə daxil olanda, bu sətirləri yazanda belə göz yaşlarıma
hakim ola bilmirəm.
Mən üç-dörd ay Orxanın
səs yazmalarından, videolarından uzaq durdum, baxa bilmədim. Şəkilləri yan-yana
qoyub paylaşa bilmədim. Düşünürdüm ki, necə yəni, Orxan ölə bilər?
Qəbul etməyim çətin oldu.
Xarakter olaraq həmişə güclü görünməyə çalışmışam. Bu üzdən də fəryad edib
özümü zəif göstərmək istəmədim. Bu səbəbdəndir ki, yalnız gecələr yastığa
başımı qoyanda ağlamışam. Bu iki xüsusiyyətdə bir-birimizə çox oxşayırdıq. Hər
zaman demişəm ki, mən Orxanın bacısıyam. İndi isə qürurla deyirəm: “Mən şəhid
top komandiri Orxanın bacısıyam”! O topçu ki, əli, üzü yanıb, xəstəxanaya
aparıblar. Həkim deyib ki, qal burda, yaraların sağalsın, sonra gedərsən.
Qayıdıb deyib ki, "mən getməliyəm, vəssalam. Bir dəqiqə belə burda qala
bilmərəm, yoldaşlarım məni gözləyir"!
Dayıma deyibmiş ki:
"Əlim yanıb, xəstəxanaya gedirəm, amma söz ver ki, atamgilə bu barədə heç
bir söz deməyəcəksən”.
Düşünürəm ki, bəlkə də dayım bizə bildirsəydi,
qardaşım bu gün həyatda olardı. İndi isə mən, həmin topcunun bacısıyam...
Qardaşımla fəxr edirəm...
Bizim üçün elə şərəfli ad
qoyub gedib ki, bir tərəfimiz acı çəkir, digər tərəfimiz qururlanır. Kaş, hər
birimizə belə şərəfli ölüm qismət olaydı...
Şəhidlərimiz Azərbaycan,
Qarabağ üçün şanlı bir tarix yazdılar. Təkcə qardaşımla deyil, şəhidlərimizin
hər biri ilə qürur duyuram. Onların haqlarını nə etsək də, ödəyə bilmərik.
Allah bütün şəhidlərimizin ruhunu şad eləsin”!
Şəhid topçu komandirin
əsgəri Məlik Cəfərov isə ötənləri xatırlayaraq deyir ki, 2020-ci il, avqustun
15-də Ağdam rayonu ərazisindəki “N” saylı hərbi hissəyə bölünmüşdüm. Orada
Mönsümzadə Orxanın əsgəri olmuşam: “...Bu müddətə kimi bəlkə də onun qədər gənc
əsgərlərə yaxşılıq edən bir komandir olmayıb. “Aprel döyüşləri”ni görmüş,
barıtın iyini duymuş bir insan idi. Döyüşlərdən bir həftə qabaq məndən və bir
neçə əsgərdən sorğu-sual etmişdi: “...Mülki həyata qayıtsan, ilk olaraq
dükandan nə alardınız”? Biz də hərəmiz bir nümunə gətirmişdik. Həmin günü
komandirimizin atası Səfiyar dayı öz “Jiquli”si ilə bizə bazarlıq edib
gətirmişdi. Hər bir əsgəri sevindirmişdi. Masa arxasında özü bizimlə birlikdə
oturub ürək-dirək verib dedi ki, “heç nədən qorxmayın, siz bu Vətənin keşiyində
duran mərd əsgərlərsiniz”!
Döyüş başlayan günü biz
ona baxıb ilhamlanırdıq. Çünki mərminin səsini eşidib sığınacağa girmirdi.
Deyib-gülürdü, elə bil heç döyüşdə deyildi. Əsgərləri qoruyurdu, deyirdi ki,
siz girin içəri, mən özüm həll edəcəm. Hamı topu iplə atanda o, çaxmaqdan
çəkirdi. Onun bir sözü var idi: "qanı qanla yuyarlar...”
2020-ci il sentyabrın
17-də onun ad günü idi. Əsgərlər onu o qədər çox istəyirdilər ki, komandir
heyətində heç birinin ad gününü bilmirdik, amma əsgərlərlə atışdıq, hər axşam
gedirdik kazarmanın əsgər çayxanası deyilən yer vardı, orada oturub çay
içirdik, əsgərlərlə pul toplayıb onun ad gününü orada qeyd elədik. Biz
batereyanın yeni əsgərləri idik. Digər komandirdən bir şey öyrənirdiksə, ondan
beşqat artıq öyrənirdik. Çox ciddi və tələbkar idi. Top atmağı bizə o
öyrədibdi. Növbəti gün öyrətdiyini bizdən soruşardı. Məhz bu tələbkarlıq
sayəsində 44 günlük döyüşdən baş çıxara bildik.
Dərs vaxtı tələbkar idi.
Problemim olub, hər kəs kimi mənim də problemimi həll edib. Döyüş günü,
döyüşdən əvvəl də ürək-dirək verirdi bizə. Deyirdi ki, bu formanı geyinmisənsə,
sonuna kimi döyüşməlisən, fərqi yoxdur, yanınızda kim yaralandı, kim şəhid
oldu, döyüşü saxlamalısan! Amma o şəhid olanda bütün toplar dayandı, onunla
bərabər Ağakişiyev Nurlan da şəhid oldu. Hüseynov İlqar isə yaralandı və
maşında yolda şəhid oldu...”
Orxanın döyüş yolundan danışan topçu Məlik Cəfərov xatirələrini bircə-bircə yada salıb deyir:
“...Yaxşı yadımdadı, mərmi düşəndə bir dəfə də olsun, gözünü qırpmadı. Çünki o,
2016-cı ildə “Aprel döyüşləri”ndə, səhv etmirəmsə, artreliyada olmuşdu. 28-də
axşam atışma başladı, hamı sığınacaqdaydı. I top komandiri o, idi. Mən isə II
topda. Əslində, tağım komandiri kimi hər iki topa o baxırdı. Ora mərmi düşdü,
qəlpə hər tərəfə yayıldı, Orxan ölümün gözünə dik baxaraq topun yanında
şəhidlik məqamına ucaldı. Onun bir qolu yox oldu. Sabahısı gün torpağın içindən
Bilal tapıb gətirdi.
O, şəhid olandan sonra
biz tək onun yox, bütün şəhidlərimizin qisasını aldıq. Düzdür, onun bronjletini
gətirdilər, amma şəhid olanda əynində bronjlet yox idi. Olsaydı belə, onu
qoruya bilməzdi. Çünki qəlpənin biri başına dəymişdi, biri isə qolunu dibdən
götürmüşdü.
Oktyabrın 1-də bizim
qərargah rəsi şəhid oldu, həmin bronjletləri yuduq. 5 gün biz qəti şəkildə
özümüzə gələ bilmirdik. Sonra ümumi batareyanı vurdular, biz ordan çıxdıq, ora
xiyaban kimi qaldı. 1 ildən sonra mən təxris olundum. Bu müddətdə də onun kimi
bir igidi görə bilmədim.
Kaş ki, sağ olaydı. O
insanla heç bir kəs əlaqəni kəsməzdi. Hətta biz şahidi olduq ki, komandirin
əvvəlki əsgərləri ona yazır. İndi də həmin divizyonda onun kimisini görə
bilməzsiniz. Onun güclü hissiyatı var idi. Şəhid olmamışdan iki saat əvvəl
şəhid olacağını hiss eləmişdi. Tez-tez
deyirdi ki, şəhid olacam. Deyirdik, komandir, bu gedişlə mümkün deyil. Onun
gözündə heç bir qorxu yox idi. Digər tağım komandirinin müavini, çavuş
İbrahimov Tural da yaralandı. Onu yaralı vəziyyətdə səngərdən mənimlə bir MAXİ
çıxardı. Ona da deyirdi ki, İbo, İbo mən şəhid olacam. Hər şeyi də telefona
çəkirdi. Telefonun içindən də qəlpə keçmişdi. Aparıb ustaya göstərdim, lakin
əvvəlki vəziyyətinə gətirə bilmədi ki, içərisində olan məlumatları götürək. Biz
onun qorxmazlığını kənardan eşitməmişik, gözlərimizin şahidi olmuşuq...”
Şəhidin sinif və döyüş
yoldaşı, gizir Seymur Behbudov 2016-ci ilin “Aprel döyüşləri”ndə yüksək
səviyyədə iştirak etmisdi. Atdığı “D-30” topundan düşmənə ağır zərbələr vurmus,
xeyli silahlı quldurları - erməniləri öldürmüşdü. O da döyüş və sinif yoldaşı
Orxanın əsl Azərbaycan oğlu olmasından qürurla söz açır: “Orxanla aramıızda
belə bir şərt kəsmişdik: “kimin toyu birinci olsa onun toyuna 500 manat salacağıq”.
Əvvəl Orxan nişanlı oldu, mən onun toyuna pulu salmağa günlər sayırdım... Çox
əfsuslar olsun ki, II Qarabağ döyüşlərində düşmənə ağır zərbələr endirən zaman
qarşı tərəfdən atılan minaatan mərmisi onu ağır yaralayıb və... Onunla son
danışığımız şəhidlik zirvəsinə ucalmamışdan yarım saat əvvəl olmusdu. Son
sözləri belə oldu: “...Seymur, diqqətli ol, torpaqları geri qaytardıqdan, azad
etdikdən sonra oturub bir yerdə qələbəni qeyd edərik...”
Mən belə bir dostu
itirmişəm. Dost itkisi ağır olur, hətta, doğmalardan da. Orxan kimi igid,
qorxmaz oğullar hesabına bu gün qürurla gəzirik. Düşməni məhv eləmişik. Ruhları
şad olan şəhidlərimizə Allah rəhmət eləsin!”
Keçmiş döyüşçü Amil Nurullayev də çavuş Mönsümzadə Orxanın əsgəri olub. Ona görə də
komandiri haqqında ürəklə danışır. Deyir ki, o, bam-başqa bir qismət idi: “O,
həm öz əsgərini, həm də bölükdəkilərin hamısını sevərdi. Qətiyyən ayrıseçkilik
etməzdi. Çox ədalətli komandir idi. Kaş, elə bütün hərbiçilər onun xasiyyətdə
olaydı. Əsgərlərin üzündə hər zaman gülüş yaradardı. Hətta kənardan yemək
sifarişi edərdi, deyərdi: "Qaqa, rahat olun, yeyin, xidmət xidmətdi,
kənarda qardaşıq"...
Bizə belə qayğı göstərərdi.
Əsgərlərə özü ləqəb qoyardı. Topun əhəmiyyətini geniş izah edər və bizə “topu
sevin, sizin üçün burda dəyərli nə varsa odur, onu qoruyun ki, o da döyüş günü
sizi qorusun”.
9 illik xidmətində “Aprel
döyüşləri”ndə də iştirak etmişdi igid komandirimiz. 2 topu təkbaşına özü hədəfə
tuşlamış, mərmi ilə doldurmuş, idarə etmiş, hədəfi tuşlayıb vurmuşdu. Nəhayət, döyüş
başlayanda çox həvəsli idi. Onun videolarından da görə bilərsiniz necə sevinir,
necə şən idi. Amma, buna baxmayaraq, heç bir əsgəri sığınacaqdan çıxmağa
qoymazdı. Elə biri mən özümü. Əsəbləşib deyərdi ki, çıxma ordan! Özüm atacam topu,
əsas sizə heç nə olmasın...
Ordumuz Kəlbəcərə daxil
olarkən xəbəri eşidən Mönsümzadə: "bu xəbəri eşitdimsə, rahat şəhid ola
bilərəm”, - dedi. Sonra da əlavə etdi ki, “inşəallah salamatçılıq olsun, orada
da xidmət edərik".
Döyüş vaxtı deyirdi ki, mənimlə doyunca vaxt keçirin,
bir azdan şəhid olacam... Elə belə də oldu... Döyüş vaxtı heç kim özünü
itirməsin, həyəcanlanmasın deyə hamını güldürüb mənəvi dəstək olardı. Anasıyla
da danışdı o gün, dedi: “Biz tərəflər sakitçilikdir, axşam gələcəm evə...”
Amma həmin danışıqdan 30
dəqiqə sonra şəhid oldu... Bir sözlə, əsgərə həm komandir, həm qardaş kimi
yaxın idi o insan.
O gün hava yavaş-yavaş
qaralırdı. Səngərdə durmuşduq, komanda qəbul edirdi Orxan. Həmin anda
səngərdəki qəlpə tutdu onu. Eləcə səngərin içərisində də şəhidlik zirvəsinə
ucaldı. Onunla birgə Əsgər Ağakişiyev, Nurlan Etibar oğlu və İlqar Hüseynov da
şəhidlik zirvəsinə ucaldılar. Eyni gündə 3 şəhid verdik...
Bircə bunu deyə bilərəm ki, onun intiqamını
aldıq. Daha doğrusu, 2-ci bölüyün topu
aldı. Mönsümzadə Orxanı vuran minaatanın düz lüləsinin içindən vuraraq həm
qurğunu, həm də partlayış nəticəsində onun heyətini məhv etdik...”
Cəmilə Çiçək/Zekainfo.az
Prezident təqaüdçüsü,
flologiya üzrə fəlsəfə doktoru