Avropa Komissiyası Çin istehsalı olan Tesla avtomobillərinə idxal rüsumlarını əhəmiyyətli dərəcədə azaldıb və bu, potensial olaraq Avropada satışların artmasına yol açır.

Avropa İttifaqı Çin istehsalı olan Tesla elektrik avtomobillərinə tətbiq edilən əlavə gömrük rüsumlarını əvvəllər nəzərdə tutulan 20,8% əvəzinə 9%-ə endirib. Bu yeni dərəcə Çində 17% ilə 36,3% arasında dəyişən digər elektrik avtomobil istehsalçılarına tətbiq edilənlərdən əhəmiyyətli dərəcədə aşağıdır.

Növbəti beş il üçün yeni gömrük rüsumlarını təyin edəcək planın hələ oktyabrın 31-nə qədər Aİ-nin 27 üzv dövlətinin əksəriyyəti tərəfindən təsdiqlənməlidir.

Bu qərar Amerikanın Tesla şirkətinin Avropa Komissiyasının Çində istehsal olunan elektrik nəqliyyat vasitələrinə tətbiq etdiyi gömrük rüsumları ilə bağlı fərdi qiymətləndirmə tələbindən sonra verilib.

Aİ hesab edir ki, Pekinin avtomobil sənayesinə verdiyi subsidiyalar “ədalətsizdir” və Avropa istehsalçılarına “əhəmiyyətli zərər” vurur. Bununla belə, araşdırma apardıqdan sonra Komissiya Teslanın Çin hökumətindən əvvəllər düşündüyündən daha az subsidiya aldığı qənaətinə gəlib.

Amerikalı avtomobil istehsalçısı əsasən bazar qiymətlərindən aşağı olan akkumulyatorlardan, həmçinin torpaqdan istifadə və gəlir vergisində sərfəli azalmalardan faydalanır.

Aİ ölkələri tərəfindən təsdiq olunarsa, əlavə gömrük rüsumları artıq Çindən elektriklə işləyən avtomobillərin idxalına tətbiq edilən 10% verginin üzərinə düşəcək.

Tərcümə edəni Səfər Abbasov/Zekainfo.az