Cülyetta yoxa çıxdı. Franko Zeffirellinin 1968-ci ildə çəkdiyi "Romeo və Cülyetta" filmindəki yeniyetmə Cülyetta roluna görə "Qızıl Qlobus" mükafatı laureatı britaniyalı aktrisa Olivia Hussey dekabrın 27-də 73 yaşında vəfat edib.

“Olivia diqqətəlayiq bir insan idi, onun istiliyi, müdrikliyi və saf xeyirxahlığı onu tanıyanların hamısının həyatına toxundu. O, sənətə, mənəviyyata və heyvanların müdafiəsinə ehtiras, sevgi və fədakarlıqla dolu bir həyat yaşadı” deyə, ailəsi İnstaqram hesabında paylaşdıqları bəyanatda bildirib.

Argentinanın Buenos-Ayres şəhərində anadan olan Olivia Hussey, o zaman 16 yaşlı ortağı Leonard Whiting ilə Uilyam Şekspirin faciəsinin Akademiya mükafatına layiq görülən uyğunlaşdırılmasında məşhur sevgililəri oynayanda 15 yaşında idi.

2023-cü ildə iki aktyor razılaşdırılmamış çılpaqlıq səhnəsinə görə Paramount Pictures studiyasına şikayət etdi. Amerikalı hakim daha sonra şikayəti rədd etdi və Paramount-un xeyrinə qərar verdi.

Performansına görə "İlin Yeni Ulduzu" nominasiyasında Qızıl Qlobus mükafatını alan Olivia Hussey daha sonra 1974-cü ildə çəkilmiş "Qara Milad" qorxu filmində və 1978-ci ildə Aqata Kristinin Nildə Ölümü filminin uyğunlaşdırılmasında və digər layihələrdə rol alacaqdı.

Tərcümə edəni Səfər Şakiroğlu Zekainfo.az/