Mədəniyyət
11:31, 21 Oktyabr 2026
Azərbaycan Milli Konservatoriyasında ustad xanəndə, Xalq artisti Zabit Nəbizadənin bugünkü dərsi səmimi bir musiqi anı ilə yadda qalıb. Bu dəfə ustadın qarşısında balaca ifaçı — Novruzlu Ayxan Həsən oğlu dayanıb. O, Ələkbər Tağıyevin bəstələdiyi, Xəlil Baxışın sözlərinə yazılmış “Qəşəngdir” mahnısını ifa edir.
Ayxanın ifasına tarda Azərbaycan Milli Konservatoriyasının müəllimi Vaqif Təhməzov müşayiət edir. Ustadın tövsiyələri, tarın müşayiəti və balaca ifaçının həvəsi bu dərsə xüsusi bir ahəng qatır.
Musiqi öyrənmək yalnız düzgün oxumaq deyil, həm də mahnının ruhunu duymaq, sözün mənasını anlamaq və hisslərini səslə ifadə etməkdir. Belə dərslərdə uşaq tədricən yalnız ifa bacarığı qazanmır, həm də milli musiqimizə sevgi ilə bağlanır.
Muğam sənətinin yaşaması ustadla şagird arasında qurulan bu mənalı bağdan başlayır. Bir tərəfdə illərin sənət təcrübəsi, digər tərəfdə öyrənmək həvəsi ilə dolu balaca bir ürək… Bu gün verilən hər bir tövsiyə sabahın sənət yoluna işıq sala bilər.
Sənət ustaddan öyrənilir, sevgi ilə yaşadılır və gələcək nəsillərə ötürülür.
